(កំពង់ស្ពឺ)៖ ដោយបានការចង្អុលណែនាំដ៏ខ្ពង់ខ្ពស់ពីលោកឧត្ដមសេនីយ៍ទោ ឃឹម សុកខៃ ស្នងការនៃស្នងការដ្ឋាននគរបាលខេត្ដកំពង់ស្ពឺ អនុវត្ដករណីកំហែងយកដោយមានអាវុធ(កាប់ប្លន់)ថ្ងៃទី០៧ ខែកញ្ញា ឆ្នាំ២០២៥ ។
យោងតាមរបាយការណ៍របស់សមត្ថកិច្ច បានឱ្យដឹងថា ជនរងគ្រោះឈ្មោះ សាត រស់ ភេទប្រុស អាយុ ២៣ឆ្នាំ នៅភូមិពង្រ ឃុំតាំងក្រូច ស្រុកសំរោងទង បានជិះម៉ូតូ ០១គ្រឿង ម៉ាកហុងដា សេ១២៥ ពណ៌ខ្មៅ ឆ្នាំ២០១៩ ផ្លាកលេខ កណ្ដាល 1AE-7272 ចេញពីផ្ទះមិត្ដភក្ដិនៅភូមិក្រាំងពោធិ៍ ឃុំអូរ ស្រុកភ្នំស្រួច តាមផ្លូវជាតិលេខ៤ ពីលិចទៅកើតដល់គីឡូម៉ែត្រ៥៦-៥៧ ភូមិពង្រធំ ឃុំកាហែង ស្រុកសំរោងទង មានក្រុមជនសង្ស័យចំនួន ០៥នាក់ ជិះម៉ូតូ ០២គ្រឿង តាមមកពីក្រោយបានយកកាំបិតផ្គាក់ ខ្វេវដងដែក គំរាមកាប់មកលើខ្លួន ពេលនោះខ្លួនមានការភ័យខ្លាចក៏បានផ្ដួលម៉ូតូចោលរួចរត់តែម្ដង ចំណែកម៉ូតូត្រូវក្រុមជនល្មើសលើកជិះគេចខ្លួនតែម្ដង។
លោកវរសេនីយ៍ឯក ឃុត សុផល អធិការស្រុកសំរោងទង ក្រោយទទួលបានព័ត៌មាន បានចាត់កម្លាំងជំនាញព្រហ្មទណ្ឌស្រុក ចុះសហការជាមួយកម្លាំងប៉ុស្ដិ៍នគរបាលរដ្ឋបាលកាហែង ប៉ុស្តិ៍នគរបាលរដ្ឋបាលធម្មតាអរ និងកម្លាំងអធិការដ្ឋាននគរបាលស្រុកភ្នំស្រួច ចេញអន្តរាគមន៍ភ្លាមៗ រហូតកំណត់មុខសញ្ញាបាន និងធ្វើការស្ទាក់ឃាត់មុខសញ្ញាបាន ០៥នាក់ នៅចំណុចភូមិប្រាសាទ ឃុំមហាសាំង ស្រុកភ្នំស្រួច ផ្លូវក្រាលកៅស៊ូត្រពាំងអោប ទៅឃុំព្រៃក្មេង ស្រុកភ្នំស្រួច ។
អ្នកទាំង ០៥នាក់ រួមមាន៖
១-ឈ្មោះ យ៊ាំង សុភ័ស ប្រុស ២០ឆ្នាំ
២-ឈ្មោះ យ៊ាំង ភា ប្រុស ១៨ឆ្នាំ
៣-ឈ្មោះ ឆិល មករា ប្រុស ១៥ឆ្នាំ
៤- ឈ្មោះ អ៊ុំ ចាន់ដេត ប្រុស ១៤ឆ្នាំ
៥-ឈ្មោះ ទឿង វាសនា ប្រុស ១៤ឆ្នាំ បក្ខពួកប្លន់ម៉ូតូខាងលើជាមុខសញ្ញាចាស់ធ្លាប់កាប់ប្លន់យកម៉ូតូកាលថ្ងៃទី៣១ ខែសីហា ឆ្នាំ២០២៥ ផ្លូវជាតិលេខ៤ គីឡូម៉ែត៦៧-៦៨នៅចំណុចភូមិត្រពាំងអត់ទឹកឃុំគីរីវន្ត ស្រុកភ្នំស្រួច។
សមត្ថកិច្ចដកហូតបានម៉ូតូ ០៣គ្រឿង របស់ជនរងគ្រោះទាំងអស់ រួមជាមួយកាំបិតផ្គាក់ ខ្វេវដងដែក ០១ និងទូរសព្ទដៃ ០២គ្រឿង បច្ចុប្បន្នបានបញ្ជូនមកកាន់អធិការដ្ឋាននគរបាលស្រុក បំពេញនីតិវិធី ដើម្បីកសាងសំណុំរឿងបញ្ជូនទៅការិយាល័យព្រហ្មទណ្ឌធ្ងន់ ចំណាត់ការតាមផ្លូវច្បាប់៕
