នារីម្នាក់ ជិះម៉ូតូធំ សង្ស័យវ៉ារថយន្តសណ្ដោងរ៉ឺម៉កខាងស្ដាំដៃមិនផុត ដួលចូលក្រោមកង់កិនស្លាប់យ៉ាងអាណោចអាធ័មនៅនឹងកន្លែង កាលពីវេលាម៉ោង ១៨៖៣៥ នាទីយប់ ថ្ងៃ០៥ ខែកញ្ញា ឆ្នាំ២០២៥ ត្រង់ចំណុចផ្លូវបេតុងព្រៃស ស្ថិតក្នុងភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។
ជនរងគ្រោះឈ្មោះ យូ ចាន់ណា ភេទស្រី អាយុ ៣១ឆ្នាំ មុខរបរលក់ដូរ មានទីលំនៅភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្ដាល។ ដោយឡែក ភាគីរថយន្តម៉ាក HINO ពណ៌បៃតង ពាក់ផ្លាកលេខ ភ្នំពេញ 3A-3048 (អ្នកបើកបររត់គេចពីកន្លែងកើតហេតុ)។ រីឯភាគីម៉ូតូម៉ាក YAMAHA R6 ពណ៌ស ពាក់ផ្លាកលេខ ភ្នំពេញ 1GB-6009។
តាមប្រភពព័ត៌មាន បានឱ្យដឹងថា មុនពេលកើតហេតុ រថយន្ត និងម៉ូតូ បើកបរស្របទិសគ្នា ទិសដៅពីកើតទៅលិច ពេលមកដល់ចំណុចកើតហេតុ ម៉ូតូក៏ឡើងវ៉ារថយន្តខាងស្ដាំ រួចបានវ៉ាក់ជាមួយរថយន្ត ០១គ្រឿងទៀត បើកថយក្រោយ ហើយម៉ូតូក៏បានគេចបោកចូលក្រោមរថយន្តដែលមកស្របទិសគ្នាតែម្ដង។
ក្រោយកើតហេតុ សមត្ថកិច្ចមូលដ្ឋាន បានចុះទៅដល់ រួចធ្វើកំណត់ហេតុប្រគល់សពជូនក្រុមគ្រួសារយកធ្វើបុណ្យតាមប្រពៃណី។ ចំណែកវត្ថុតាង (រថយន្ត និងម៉ូតូធំ) ត្រូវបានសមត្ថកិច្ចជំនាញធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌដង្កោ ដើម្បីបន្តនីតិវិធី៕
